Erfiðir dagar núna

Góðan og blessaðan daginn, það eru sko erfiðir dagar hjá mér núna.  Ég ákvað að prófa eitthvað hreinsidagaprógram frá Aloa Vera sem eru 9 dagar, mér finnst það geggjað erfitt.  Ég fæ svo mikinn höfuðverk.  En þetta stillir af magann og hreinsar líkamann innan frá. 

En mér finnst þetta ekkert spennandi, ég er á þriðja degi núna, en 2 fyrstu dagarnir eru erfiðastir er mér sagt.  Vinkonur mínar eru líka í þessu og það renna af þeim kílóin, en ekki hjá mér :-(   Meira að segja þegar ég byrjaði hafði ég aðeins bætt á mig og þarf ég að skrá það samviskusamlega inn.  En ég veit ekki hvort ég held þennan kúr út.  Held að mér henti bara að gera áfram eins og ég hef verið að gera.  Hreyfingarprógram Ágústu Johnson og svo huga að mataræðinu með DDV bak við eyrað.  Í þokkabót þá er ég eitthvað voðalega lítil í mér þessa dagana, en það kemur allt með  tímanum.

Vona að ykkur gangi vel, bestu kveðjur!! Djúsígella

Það er komið sumar!!!

Jæja það er komið sumar, sólin farin að skína, grasið orðið grænt og bara yndislegt veður.  Ég er farin að nota hjólið mitt og við hjólum orðið alltaf í vinnuna og skólann, ég og synir mínir.  Okkur finnst það alveg frábært og við förum líka stundum í hjólreiðatúra á kvöldin eða eftir vinnu.

Ég hef ekki verið dugleg að skrá það sem ég borða.  En ég drekk alltaf amk.2 lítra af vatni á dag og borða ávexti og morgunmat.  Fæ mér bara einu sinni á diskinn og þetta kemur allt saman þó hægt sé.  En nú ætla ég að fara að taka mig á því að það eru enn nokkur kíló eftir og það er alveg að koma júní.  Þannig að það er farin að koma pressa á mig að gera betur ef ég ætla að standa við planið mitt.

Vona að ykkur gangi vel.

Ég er ekki enn komin með tölvu heima, þannig að ég er alveg ferleg að far inn á bloggið þessa dagana.

Enda er mikið að gera í vinnu, vorverkunum o.fl.

Gangi ykkur allt í haginn.

Kv. Djúsígella

Þetta gengur, en gengur hægt

Góðan daginn, loksins er farið að koma betra veður, vor í lofti og fuglasöngurinn svo ljúfur á morgnana.  Ég er að reyna að taka mig á og er að horfa rosalega mikið inn á við þessa dagana.  Ég hef ekki hugsað of vel út í mataræðið, en ég hef ekki drukkið neitt kók og borða eiginlega ekkert nammi.  Ef ég hef fengið mér eitthvað svoleiðis þá er það ís eða lakkrís.  Takmarkað sykurmagn.  Ég er mjög dugleg að drekka vatn og það hefur verið mjög misjafnt hvernig hefur gengið hjá mér að stunda hreyfingartímana heima vegna þess að það hefur farið mikil orka núna undanfarið í andlegu hliðina hjá mér.

Ég fór með vinkonum mínum aðeins í bæinn að skemmta okkur um helgina og það var mjög fínt. 

Áfram, stelpur þetta kemur allt með hækkandi sól…..

Kv. Djúsígella

Enn og aftur komið að helgi

Nú er helgin framundan og vonandi næ ég að hvíla mig sem mest og best.  Við erum búin að vera mjög slöpp og þreytt alla þessa viku og ég hef ekki staðið mig vel í hreyfingunni og matardagbókinni.  Ég er ekkert farin að skrá það sem ég borða ennþá, og ég fór bara tvisvar í vikunni í MRL æfingarnar mínar.  En að vísu fór ég 3 út að hjóla í smá stund.  Vigtin stendur í stað og það er betra en að hún fari upp á við. 

Stefnan er að komast í gírinn, klára að ná þessu sleni úr sér um helgina.  Fara í barnaafmæli á sunnudaginn og gera MRL æfingar á hverjum degi.  Ég finn bara hvað það er gott.

Bestu kveðjur og góða helgi.

Flensa og aftur flensa

Góðan daginn, nú erum við að rísa upp aftur eftir erfiða flensu.  Ég og strákarnir lögðumst í bælið með 40 stiga hita, ekkert smá leiðinlegt og Aron minn var veikur í 10 daga.  En nú erum við að byrja af krafti að mæta í vinnu og skóla þannig að þetta fer að verða komið á rétt ról.

Birkir páskaunginn minn er 12 ára í dag og verður svaka bekkjarpartý heima hjá bekkjarsystur hans þar sem þau ætla að halda saman upp á afmælin sín, en Anna María á líka 12 ára afmæli í dag.

Átakið gengur, og vitiði bara hvað, ég hef verið ótrúlega dugleg að taka MRL æfingar heima.  Þ.e. ég á spólu með Ágústu Johnson með æfingum fyrir maga, rass og læri.  Þetta kemur allt og það er um að gera að vera dugleg að drekka vatn.

Gangi ykkur öllum vel. Kv. Djúsígella

Hæ hæ ég er komin aftur !!

Sælar allar ég er komin aftur, það hafa verið miklar breytingar í mínu lífi og mikið gengið á. Hef staðið í flutningum 2svar sinnum, byrjað í nýrri vinnu á nýjum stað, o.fl.  o.fl.

En þetta er að komast á rétt skrið og ég fer að verða tölvutengd heima hjá mér bráðum.

Vona að þið séuð ekki alveg búnar að gefast upp á mér. Ég kíki á ykkur fljótlega.

Bestu kveðjur  Djúsígella

Góðan og blessaðan daginn!!!!!!

Jæja þá er ég komin heim frá Svíþjóð og byrjaði að vinna í dag og byrjaði með yngstu drengina í aðlögun á leikskólanum sem ég er að fara að vinna í.  Er byrjuð að pakka niður á fullu og stefni á flutninga um helgina.

Átakið byrjar að fullum krafti aftur eftir helgina.  Ekki veitir af því ég verð að byrja nánast upp á nýtt.

En við erum búin að hafa það bara gott í fríinu og það er allt komið á fullan snúning, nóg að gera framundan.

Gangi ykkur allt í haginn og takk fyrir innlitið, en ég veit að ég þarf virkilega að fá hvatningu frá ykkur til að bretta upp ermarnar og byrja upp á nýtt.

Kv. Djúsígella (sem líður ekkert of vel)

Þá er það Svíþjóð 1.-12.ágúst

Sælar stelpur, ég ætla nú að fara að ykkar ráðum og hafa DDV bak við eyrað þó að ég fari ekki alveg eftir því en ég var 82,2 kg á vigtinni minni í morgun.  Ég er ákveðin í því að halda áfram og byrja bara upp á nýtt þegar ég kem heim frá Svíþjóð.

En að vísu verður mjög mikið um að vera hjá mér þá, ég stend í skilnaði og er að flytja eftir að ég kem heim frá Svíþjóð, íbúðin sem ég fæ verður ekki tilbúin fyrr en ég kem að utan. Þess vegna fer allt á fulla ferð þegar ég kem heim.

En endilega kíkið inn á síðuna hjá mér áfram því að mig vantar virkilega hvatningu og pepp.  Er í einhverri leiðindarlægð núna.  En ætla að njóta þess að fara til Svíþjóðar með unglinginn minn og ná í miðlunginn.  Fara í tívolí, versla og bara SLAPPA AF.

Fer til Svíþjóðar á miðvikudagsmorgun og ég kíki kanski inn á síðuna eitthvað á meðan ég verð úti.

Bestu kveðjur til ykkar allra og hafið það gott og gangið hægt um gleðinnar dyr um verslunarmannahelgina.  En ég mæli eindregið með ÞJÓÐHÁTÍÐ Í EYJUM!!

Baráttukveðjur Djúsígella.

Kem og fer - stopult sumarblogg

Hæ hæ, nú er ég búin að vera heima og að heiman fram og til baka, fór í tvö yndisleg brúðkaup á laugardaginn og lá svo bara í leti hérna heima í gær og gerði ekkert, nema að setja í þvottavél.

Er alveg að gefast upp á DDV í bili, er svo mikið á þvælingi og mér finnst það svo erfitt.

Er að fara til Eyja á morgun og verð fram á sunnudag.  Kem þá heim að þvo og undirbúa mig fyrir Svíþjóðarferðina mína.

Er komin með 2 kg upp.  Ekki nógu gott.  En mig langar ekki að gefast alveg upp.  Ég hef þetta nú bak við eyrað en fer ekki alveg eftir þessu.  Verst er það þegar maður lætur það eftir sér að fá sér í glas..

Vona að þið hafið það gott og að ykkur gangi vel.

Bestu kveðjur Djúsígella jó jó

Ég er komin heim!!!

Hæ hæ hæ,,, nú er ég komin heim, er búin að vera í fríi síðan á föstudaginn og viti menn, eiginlega líka á danska og ég veit að það er eitthvað komið til baka aftur, en ég byrja á fullu í dag.  Ég var í útilegu, fórum á Arnarstapa um helgina og svo færðum við okkur yfir á Grundarfjörð á sunnudaginn og svo kom smá klikkerí í bílinn og við urðum að gista eina nótt í Borgarnesi og komum heim í gærkvöldi.

Það var alveg geggjað veður og maður er bara orðinn sólbrúnn og fínn.  En verst var að ég fór stóra beygju frá þeim danska þegar líða tók á helgina og fékk mér áfengi og mat og hugsaði ekkert um matarskammtana mína.  En núna er ég komin heim og þá er bara haldið áfram og ekkert múður með það.  Dugleg að drekka vatn og halda mig við skammtana mína.  Ég get þetta vel, svo nú er bara að bretta upp ermarnar.

Takk fyrir innlitið stelpur, ég kíki á ykkur.

Kv. Djúsígella.